甄：好，早晨馬生！

馬：早晨！

甄：開始。

馬：好呀。

甄：我地而家開始一個澳門銀行同金融行業嘅口述歷史研究計劃訪談，今次選擇嘅議題就係澳門保險行業嘅發展歷史，我地訪問嘅對象係澳門保險公會嘅前會長同前副會長馬竹豪先生。早晨，馬生，你好！

馬：早晨，早晨，早晨！

甄：馬生曾經任職於澳門嘅友邦保險國際有限公司，亦都係我地簡稱嘅AIA，咁今次嘅訪問地點係澳門時代商業中心第十三樓嘅澳門基金會嘅meeting room，時間係2020年嘅3月15日嘅9時38分。

好，馬生你好！我係口述歷史協會嘅副會長甄桂芳，今次訪問嘅內容主要就係澳門銀行、金融行業嘅歷史裡面嘅保險業發展概況，今次訪問我地係有錄音、錄影同埋拍照，資料可能會用於澳門基金會同埋澳門口述歷史協會嘅展覽、演講、學術活動、同埋出版，請問馬竹豪先生你同唔同意今次嘅錄音錄影同埋所有資料［公開］呢？

馬：同意嘅，冇問題。

甄：好，多謝你。從我地之前搜集嘅資料知道馬生係1951年香港出生，曾經去過加拿大，同埋係喺香港工作，最後就喺澳門繼續工作嘅。

馬：嗯。

甄：我想馬生你簡單由你介紹你嘅個人成長經歷，譬如馬生介紹下個人資料，同求學期間嘅簡單嘅經歷。

馬：嗯，我就正如頭先你講，我1951年係香港出世，咁今年（2018年）都接近69歲，哈哈。

甄：嗯嗯。

馬：咁大學嘅時候我係香港中文大學畢業，主修英國文學，副修就係社會學，畢業之後嘅第一份工作就係教書，我係教英文，係一間津貼中學教咗一年英文，跟住我就入咗政府，入咗政府部門，第一個部門就係教育署，咁係教育署做咗幾年之後我地就會係周圍調嘅。

甄：嗯。

馬：咁我又曾經做過警務署，但唔係做警察，警務署做文職，人事部嘅工作，跟住政府就派咗我去英國進修，我係英國倫敦政治經濟學院，即係倫敦大學嘅一個附屬嘅學院，進修人事管理方面嘅課程，返嚟就入咗政府銓敍科，銓敍科即係而家嘅公務員事務局，其實係成個政府嘅人事部。

甄：嗯。

馬：咁係一直至到1990年就移民去咗加拿大，係加拿大開始保險嘅工作。開始嘅時候做一個前線嘅agent，後來就做哩個manager，跟住就有幫助公司一啲後勤嘅marketing工作，跟住公司就係希望我可以幫手去發展。除咗發展加拿大本身個華人市場，都叫我幫手研究一下，即係公司去到中國內地開展一個分行嘅工作，咁我亦都同公司上去內地做一啲前期嘅研究工作。

甄：嗰時1991年嘅時候？

馬：19，我開始嘅時候就係1991年，開始做。

甄：但係內地市場嗰陣時？

馬：嗰陣時，即係去到1997、98嘅時候，同公司上去內地做一啲前期嘅研究考察工作，係一個機會認識咗AIA香港當年嘅總經理，佢就邀請咗我返嚟香港加入AIA，我就係2000年由加拿大回流香港。係香港就工作咗半年啫，唔係好耐。喺香港AIA工作咗半年，就過咗嚟澳門AIA做澳門AIA嘅總經理，個title開始嘅時候係general manager，後期改咗名叫做chief executive officer，CEO。其實工作嘅責任都係相類似，直至到2009年金融海嘯嘅時候，公司就調咗我返嚟香港一段18個月嘅時間．到公司脫離咗AIG係香港上市，穩定咗落嚟之後我又返嚟澳門，繼續澳門CEO嘅工作，直至到2017年係離任。咁當時叫做退休，但係都半退休㗎啫。

甄：係。

馬：跟住落嚟我就繼續都留返係公司，作為一個企業顧問，叫做Corporate Adviser，其實幫助一啲年輕一輩。最主要嘅工作係幫助佢地發展，培訓佢地，比coaching, mentoring佢地嘅工作，就由17年到而家。

甄：係。其實喺保險業嘅成長過程，如果我咁聽嘅話，你係喺加拿大開始，1990年開始加入去保險業，做到你退休當時，有成27年嘅歷史囉。

馬：嗯，嗯嗯。

甄：其實你而家都係有參加社會事務嘅？

馬：係。

甄：如果係，你係曾經參加咗啲咩社會活動嘅事務呢？

馬：嗱，而家我仍然都係澳門金融學會行政委員會嘅委員，係由2003年金融學會成立一路到而家十幾年嘅時間。過往我公職包括保險公會工作，由副會長，會長我都做過，就政府嘅公職就有統計諮詢委員會嘅委員，我諗做咗5、6年，另外就有退休基金會嘅諮詢委員會委員，咁嗰個呢就都做咗4、5年時間，公職方面主要都係咁樣。

甄：我諗我寫錯咗，唔係銀行公會，係保險公會呀。

馬：係保險公會。

甄：保險公會，我寫錯咗。

馬：嗯嗯。

甄：保險公會，好我地返嚟討論保險業同澳門社會、同國際地位。

馬：嗯。

甄：咁我睇返，可能我問嘅歷史係哩幾十年，頭先我地一路聽到馬生係由邊年入嚟？2000年。

甄：喺2001年個時候。

馬：喺2001年來澳門。

甄：喺2001年，咁其實呢可能係2001年到而家，都係17年，10多年。

馬：19年。

甄：就當係19年、20年嘅歷史，咁再講返係馬生在過嚟之前澳門嘅社會環境變遷好大，以馬生你認知，或者係早過馬生過嚟澳門嘅時候發生嘅事，澳門哩幾十年嘅變化好大。馬生可唔可以介紹一下保險業嘅發展?我地知道係2003年開始，澳門由一個好細嘅鎮仔開始慢慢走向國際化嘅城市，馬生介紹一下保險業喺社會變遷發展其實係點樣嘅呢？

馬：嗯我2001年嚟，即係再睇返2001年之前，其實澳門係1999年回歸，回歸之前，大家都理解到當時嗰個情況係點樣，

甄：冇錯，嗯。

馬：無論治安、經濟發展其實都唔係好蓬勃，治安方面又更加係一個好大嘅關注點。到回歸之後就完全改變，我就好彩係回歸之後，樣樣都平靜落嚟先至過嚟澳門。

但係我初嚟嘅時候呢，成個保險業發展都可以講話唔係十分成熟，雖然話由八幾年都已經正式開始有監管嘅機制，保險公司要註冊，有咁嘅機制，但係一路以嚟，市民對保險認知，保險意識、需要保險程度……大家都唔係好高，水平唔係好高。跟住就金管局同業界大家一齊合作，咁樣慢慢去promote，去提倡保險的重要性，又搞好多保險嘅活動，業界同金管局都一齊搞好多活動。例如，保險日嗰類工作提升市民對保險嘅意識。經過十幾年，到而家嗰個發展都好，已經成熟咗好多，市民意識都提升咗好多。

甄：嗯，我地有一個example，就當年係30年前，我諗係大概1989年嗰陣時，因為經過深思熟慮，有一張保單出嚟，我地會見到有幾個特徵：第一就係用美金，到而家都係用美金currency嘅，咁我就想問下，當時我地嘅計算係咪全部都因為佢係美資公司用美金，定係傳統上保險所有都係用美金呢？

馬：我諗當年美資公司其中係一個原因，就算係其它嘅公司，譬如你當年係香港base嘅一啲加拿大公司，或者係香港本土嘅公司，都係流行用美金，直至都今日都係，就算今日係香港或者係澳門賣嘅保單，香港尤其是，都係美金為主嘅。港幣都係其次，而家係澳門買嘅保單都係美金、港幣、澳門幣，三種貨幣都有。但係好奇怪嘅係，澳門幣保單其實係最少數嘅，即係三種貨幣之中大部分嘅保單持有人，佢地都係選擇係美金多。

甄：喺，即係連葡［幣］、香港幣都係少用？

馬：港幣都相對比美金少。

甄：少嘅，嗯嗯，可能因為澳門元當時係叫葡幣，唔係一個流通貨幣，亦都可能係咁情形，其實哩張保單到而家都係valid嘅。即係而家仲做緊嘅？

馬：嗯嗯嗯。

甄：頭先我地曾經講開對於市民接受哩一種產品開始變化，即係之前係一種產品，譬如人壽保險唔係冇，但就唔係做得咁大嘅，咁我地一陣都可以探討下哩一種product成長嘅過程係點樣。

馬：嗯，你話就算發展到今日，純粹講life insurance人壽保險保障，到今日都係不足，啲保額都係相對係……即係如果你話講個人需要，其實都係唔夠嘅。