甄：馬生一生人嘅大部分時間，除咗公務員嗰段，可以話全部都係喺保險業嗰度產生，係你記憶之中呢，你個人有啲咩難忘嘅重大事件係曾經處理過嘅？或者係有啲咩嘢，大嘅conference或者之類咁嘅你係曾經做過？

馬：係工作上面最大嘅衝擊就係兩次，第一次就係03年嘅SARS，今次肺炎係第三個，但係我已經退下火線。咁SARS嗰時真係因為完全未試過咁樣嘅環境，當時係好驚，無論廣大嘅市民，我地嘅同事都驚。公司同市民之間嘅接觸真係有段時間斷絕咗，對生意個impact係好大，但係正如我頭先所講，嗰個係即時、短暫嘅影響，過後係提升咗市民對保險個要求、認知，事後保險需求增加咗。正如好似天鴿之後，一啲非人壽保險保障要求大大提高咗。咁第二次大嘅衝擊就係2008年09年嗰個金融海嘯，尤其是對我地公司嚟講係直接嘅影響，因為當年AIA就係AIG美國國際集團下面一個附屬分支嚟嘅，咁AIG差唔多破產。

甄：係啊，嗰時係。

馬：係啊，AIG如果冇美國政府嘅支撑、比錢注資，AIG係冧咗㗎啦，如果個parent冧，下面附屬機構都冧㗎，嗰段時間係最艱苦嘅，因為我地直接受到影響，咁當時我同金管局主席、同保監真係每日都要溝通我地個情況，因為好多保單持有人個信心都動搖，好多人退保，去surrender張單攞返現金，對我地經濟個影響好大，我地每日都要monitor情況：賣咗幾多張新單，有幾多張舊單係surrender……每日都要同金管局匯報。我地啲錢呢，有一段頗長嘅時間係唔准匯走，監管機構為咗保障澳門保單持有人嘅利益，正如香港保監亦都要保障香港保單持有人嘅利益，係ring-fenced咗，當年英文係將啲錢圍住喺度唔准你匯走。

如果有咩事嘅時候要有足夠嘅現金去支付比澳門嘅保單持有人，所以for一段頗長嘅時間，我地啲錢只可以留喺澳門，喺澳門嘅銀行體系裡面。但經過一段時間又有另外一間保險公司想買我地……終於又拉倒咗，直至到一零年正式上市，之後就一路順風。我地獨立咗出嚟，同AIG脫離咗任何關係，而家係一間獨立喺香港上市嘅保險集團，市場是在東南亞，包括澳紐18個市場運作，澳門係其中一個。

甄：嗯。

馬：咁哩個真係百年一遇嘅一個大衝擊，好彩我地都經過咗嗰段時間，如果我淨係講返澳門，我地都穩得住個陣腳，監管機構甚至當年嘅經濟財政司司長譚伯源先生，金管局主席丁連星先生，保監Dr. Pontes［潘志輝］，佢地都分別出嚟公開講AIA嘅經濟狀況，喺佢地了解之下，佢地清楚曬我地個報表，知道曬我地嘅財政實力，佢地三位都有公開同市場講：AIA係冇問題，大家唔需要擔心，保單唔會有任何損失。咁樣穩住咗保單持有人嘅信心，我地都順利捱過咗嗰段艱難嘅時間。

甄：嗯。你係曾經主持過幾個大型嘅conference係咪呀？可唔可以講一講？

馬：係啊，哩個又講返轉頭，我地成個澳門嘅保險行業都感到非常之自豪嘅，澳門係東亞保險大會嘅會員，這個大會就係東南亞12個城市，以城市作為基礎做會員，澳門係一個，香港都係，個基地係東京，比如馬尼拉、吉隆坡、新加坡、曼谷，總共12個亞洲嘅城市……仲有首爾，每兩年就有一次大會。

喺2016年，我地喺澳門第二次舉辦哩一個嘅大會，我就有幸由2014年開始帶領籌委會，去安排2016年搞哩一個大會。大會係得到澳門基金會好大嘅支持，因為澳門保險公會唔係一個有錢嘅會，好窮嘅會，我地一開始搞哩個活動嘅時候，有好多按金要比酒店，要比一啲convention planner，我地要比好多錢。開始嘅時候係要有數以百萬計嘅支出，澳門基金會好慷慨支持，應承比4百萬比我地用。開始時比咗第一筆錢我地，我地就可以好順利咁去安排其他嘢，好好彩就係有千幾人（由40幾個國家）嚟出席哩個會議，到最後我地經過核數睇我地嗰盤數係有錢剩。我地係全數4百萬全部歸還返比澳門基金會，我諗係澳門嘅歷史（澳門基金會嘅歷史）相信冇一個社團係做過相同嘅嘢。

我地成個行業覺得好自豪，就係：我地開始需要經濟資助嘅時候得到澳門基金會支持，當我地因為有好多sponsors、收開會費，夾夾埋埋，我地其實搞得掂喎，唔洗用澳門基金會嗰4百萬我地都夠喎，咁我地成個行業大家就決定要做一個好嘅社團，要樹立一個榜樣，將澳門基金會比我地嗰啲錢全數退返比澳門基金會。哩個係其中一樣我地覺得好自豪嘅。另外一樣嘢就係，我地在東亞保險大會50幾年嘅歷史中的創新：每一個參與嘅與會者（共千幾人），我地每人送一個平板電腦。

甄：噢，咁犀利！

馬：Samsung嘅平板電腦，唔係好大部，係加重咗我地嘅成本千幾蚊，我地已經load曬所有開會嘅資料入去裡面，load曬所有澳門旅遊資料，我地喺威尼斯人開，load曬所有威尼斯人資料，唔同以往任何開哩啲咁嘅convention、開會，一個大嘅binder夾住一大堆紙張。我地完全可以無紙化，送比佢地。因為我地計過條數，如果我地要印一個binder，可能個成本都要300、400百蚊一個，我地買嗰個平板電腦係千零蚊，買得多有discount，千鬆啲蚊，咁我地每一個與會者個成本係多咗幾百蚊嘅。但我地都計過條數，我地諗過度過，值得我地咁樣去做嘅：一方面環保，因為嗰個平板電腦之後都可以繼續用係其他用途，咁慳咗好多紙，咁嗰個我地係比人讚得好犀利嘅。到兩年後我去馬尼拉嘅會，都有人埋嚟仍然繼續讚我地，恭喜我地嗰年係做得好好。

另外仲有一樣嘢我地開先河嘅就係：我地都睇到哩個50幾年嘅一個嘅大會開始老化，參與啲人年紀都大，好似我當時都將近退休，咁好多都係年紀比較大，我地想多啲年輕人嘅參與，比每一個會員城市兩個免費開會會席，另外我地每人再比多唔知一萬蚊定五千蚊嘅洗費比佢地，因為佢嚟到澳門都要住酒店，我地喺12個城市裡面差唔多係全費支持佢地，派兩個人嚟澳門免費開會。

楊：嗰兩個人係咪要年輕人呀？

馬：我地有個歲數嘅限定嘅，好似35歲以下，佢地自己去篩選，用咩方法去篩選由佢地決定，但係我地有個年齡嘅限制，一定話要幾多歲以下，希望多啲年輕人參與，等佢地認識多啲東亞保險大會會議，希望引起佢地興趣，多啲參與、加入個管理階層，將來多啲開會，哩個又係50幾年嚟未有另外一個城市係做過嘅舉動，得到其他嘅會員好大嘅讚賞，最重要就係好成功、好創新，係澳門一個咁細嘅地方，可以引起到其他地方人嘅留意，認知到可以做到咁多嘢。係地圖上搵澳門，都可能搵唔到，但我地可以做到好創新、好突出，令人刮目相看“哇！咁都得。”咁樣嘅一個會議出嚟。

甄：嗯。

楊：通常嗰時一般參會嘅註冊會費係幾多？

馬：我記得好似係1千1蚊美金。

楊：包住？

馬：唔包，住係另外自己嘅，嗰個純粹就開會費。

楊：開會費、活動費。

馬：幾日嘅食（多餐）、活動費，包埋開會資料，包埋個平板電腦。

楊：嗯。

甄：嗯，好，咁時間真係都差唔多。簡單啲嚟講，馬生你係保險業裡面咁成功呀，有冇啲格言、座右銘，或者係啲難忘嘅小故事（好小嘅），分享下呢？

馬：嗱，我自己係一個競爭性好強嘅人，我要贏嘅，我在澳門一個咁細嘅地方工作，我要贏，比如我甚至想要連香港都要贏，雖然我report去香港，咁個absolute terms，我冇可能贏過香港，香港個市場大澳門10倍，咁澳門只係香港十分一個size，但係好多唔同嘅measurements，一啲我地叫做key result areas，如果我計ratio，就有機會贏，比如中介人嘅活動量，係計ratio，我有100個中介人，每個月都有70個有生意、有成績嘅，就係香港嘅數字，咁你70，我要贏過你！

甄、楊：呵呵。

馬：咁我咪做到80囉。我在位嘅時候，澳門中介人嘅活動量，個人80%嗰頭，如果我話睇我地啲行家有啲可能只係30、40個%，我地去到80，咁係離行離迾，係個市場，甚至乎對比我地公司集團其他嘅市場，我地都係No.1。有好幾個計ratio嘅key result areas，澳門咁細嘅市場都係我地18個市場裡面第一，冇人追得到。

講一個小故事，每年我地18個市場啲負責人都會一齊開會，有一啲共同嘅策略，每年都會有一次、兩次、三次咁樣一齊開會，［佢地］都話我係一個好勝嘅人，我曾經同其他十幾個市場嘅同事講：我比個challenge你地，係某幾個key result areas，如果你地贏得到澳門，我自己掏荷包，我請你地去澳門四日三晚五星酒店、米芝連三星餐廳，全部我自己包。我一連兩年比佢地咁嘅挑戰，但我明知冇人做得到，哩啲就係我要贏，講得俗啲：我要串，係冇人做得到嘅，咁我就係一個咁好勝嘅人。我有咩格言，有好多人就話，你唔洗同人地比，你贏過你自己就得，我唔信哩樣嘢㗎，我有一個格言係英文講，我就話：

甄、楊：嗯嗯。

馬：即係你一定要第一，你先係勝利，如果你唔係第一，你係第二，冇人記得你，我地而家可能記得好多，奧運金牌得主，但記得幾多個奧運銀牌得主？唔會記得，咁所以我自己嘅belief就係：你要贏，你要成為一個勝利者，你就係“you have to be No.1”，咁如果有人話，你贏過自己！咁我話，如果你舊年考第尾，今年考尾二，夠未呀？梗係唔得，係咪？如果你要成為一個勝利者，你梗係要考第一嘛，考第二都唔夠。

甄：如果你嗰年考第一咁你下次點呢？

馬：繼續考第一囉。

甄：就係你唔會再超越，再考第一？

馬：咁我幾樣嘅業績指標都保持住咁多年，我在位嘅時候，係冇人追得過我，咁咪年年我見到佢地，次次見到佢地，我都可以繼續串佢地囉。

甄：哈哈，咁對年輕嘅一代從業員有咩寄語啊？

馬：從業員，即係我地頭先都講到，會唔會有啲違規嘅行為？當你一偏離咗個客戶做中心，你就可能諗到自己嘅利益，咁一諗到自己嘅利益呢，就有可能出現一啲違規嘅行為，咁所以我同啲年青嘅一輩我都講，尤其是我地哩個行業，任何嘅時間，你都係要以客戶嘅利益為最大嘅考慮，任何情況之下，你都唔可以係考慮到：我咁樣做對我自己有啲咩益處呢？一定係要以客戶為先，例如我講返2016年我地搞嗰個東亞保險大會，我地個theme主題就係the future of insurance－customer centricity，啫係以客戶為中心，如果我地任何時間、做任何嘢都以客戶為中心嘅時候，就一定係會做正確嘅事，一定唔會行差踏錯嘅。

甄：嗯嗯。好，咁今次嘅訪談我諗真係要完，我地真係估唔到做訪問咗咁耐，真係唔好意思。而家完結嘅時間係12點09分呀，多謝馬生接受我地嘅訪談。

馬：唔好客氣，多謝你地！

楊：多謝曬！

甄：多謝Helen，多謝你地個同學，亦都多謝我地嘅協調員Suki，協會副理事長，咁呀多謝曬各位！

馬：多謝你地花時間。

甄：唔客氣呀，好精彩個訪談。

楊：係呀，學左好多嘢！